પશ્ચિમ ગુજરાત રાજ્યમાં ભૂકંપના કારણે ગભરાટ ફેલાયો છે. રાજ્યના મહેસાણામાં મોડી રાત્રે ધરતી ધ્રુજારીને કારણે લોકો ઘરની બહાર આવી ગયા હતા. ભૂકંપની તીવ્રતા રિક્ટર સ્કેલ પર 4.2 માપવામાં આવી છે.

નેશનલ સેન્ટર ફોર સિસ્મોલોજીએ જણાવ્યું હતું કે શુક્રવારે રાત્રે 10:15 વાગ્યે ભૂકંપના તીવ્ર આંચકા અનુભવાયા હતા. રાત્રે અચાનક ધરતી ધ્રૂજવાથી લોકો ગભરાઈ ગયા હતા. પહેલા તો રાત્રિના અંધકારમાં સ્થાનિક લોકોને સમજ ન પડી, બાદમાં મામલો સમજતા જ લોકો ઘરની બહાર નીકળી ગયા.

મળતી માહિતી મુજબ, ભૂકંપનું કેન્દ્ર ગુજરાતના મહેસાણામાં લગભગ 10 કિમી ભૂગર્ભમાં હતું. મહેસાણાની સાથે અમદાવાદમાં પણ લોકોએ ભૂકંપના આંચકા અનુભવ્યા હતા. અમદાવાદના વાડજ, અંકુર, નવા વાડજ અને આસપાસના વિસ્તારોમાં ભૂકંપના આંચકા અનુભવાયા હતા. જેના કારણે લોકોમાં ભય ફેલાયો હતો. ભૂકંપના કારણે લોકોને 23 વર્ષ પહેલાનું દ્રશ્ય યાદ આવી ગયું. સ્થાનિક વહીવટી તંત્ર પણ હરકતમાં આવ્યું હતું.

લગભગ એક મહિના પહેલા ગુજરાતના કચ્છ વિસ્તારમાં ભૂકંપના આંચકા અનુભવાયા હતા. 17 ઓક્ટોબર, 2024ના રોજ સવારે 3:54 વાગ્યે ભૂકંપ આવ્યો હતો. ભૂકંપની તીવ્રતા રિક્ટર સ્કેલ પર 4 માપવામાં આવી હતી. તેનું કેન્દ્ર કચ્છ કેક ખાવડાથી લગભગ 47 કિલોમીટર ઉત્તર-પૂર્વમાં હોવાનું કહેવાય છે. જોકે કોઇપણ પ્રકારનું નુકસાન થયું ન હતું.

ગુજરાતના આ શહેરોમાં ધરતીકંપે ધરા ધ્રૂજાવી

વડોદરામાં ભારે વરસાદ પડવાને કારણે ગયા અઠવાડિયે ભારે પૂર આવ્યા હતા, શહેરવાસીઓને ભારે નુકશાન અને પરેશાની વેઠવી પડી છે. આ પૂરને પગલે સોશ્યલ મીડિયામાં એક વીડિયો વાઈરલ થયો હતો, જેમાં શહેરમાં આવેલા પૂર માટે બુલેટ ટ્રેન પ્રોજેક્ટના નિર્માણ કાર્યને જવાબદાર ઠેરવવામાં આવ્યું હતું. પરંતુ એનએચએસઆરસીએલે સ્પષ્ટતા કરી છે કે બુલેટ ટ્રેન પ્રોજેક્ટ માટે ચાલી રહેલા પુલના નિર્માણના કામને કારણે વિશ્વામિત્રી નદીમાં પૂર આવે છે તે દર્શાવતો એક ભ્રામક વીડિયો ફરતો કરવામાં આવી રહ્યો છે.

વીડિયોમાં દેખાડવામાં આવેલી સેટેલાઇટ તસવીરો ચોમાસા પહેલાની છે.

આ વિસ્તારમાં ભારે વરસાદની આગાહીને ધ્યાનમાં રાખીને, નદીના વહેણને સરળ બનાવવા માટે નદી પર પુલ બનાવવાની સુવિધા માટે બનાવવામાં આવેલ કામચલાઉ એપ્રોચ રોડને ચોમાસા પહેલા તોડી પાડવામાં આવ્યો હતો. એટલે તેના કારણે પાણીના નિકાલમાં અવરોધ ઊભો થયો હોય એમ નથી. મતલબ કે પુલના નિર્માણથી નદીના વહેણમાં કોઈ અવરોધ ઉભો થતો નથી.

વડોદરાના પૂર માટે બુલેટ ટ્રેન પ્રોજેક્ટ કારણભૂત નથી : NHSRCL 

ગુજરાતમાં ડિઝાઇનિંગ ઇન્ડસ્ટ્રીનું ક્લચરને નવી રાહ આપી ઇનોવેશન્સ સાથે આર્ટિફિશિયલ ઇન્ટેલિજેન્સનો સુચારુ ઉપયોગ કરવાના ઉદેશ્ય સાથે રેડ & વ્હાઇટ મલ્ટીમીડિયા ઇન્સ્ટિટ્યૂટ અને સુરત ડિઝાઇન કોમ્યુનિટીના સંયુક્ત ઉપક્રમે યોગી ચોક ખાતે રાજ્યકક્ષાની 'ડિઝાઇન સ્પાર્ક મીટ અપ' યોજાઈ હતી.

સ્વિગીના ડાયરેક્ટર ઓફ ડિઝાઇનના સપ્તશ્રી પ્રકાશ,લોટીફાઇલ્સના પ્રોડક્ટ ડિઝાઈનર ગૌરવ કુમાર, એડીપી લિસ્ટના કો.ફાઉન્ડર એન્ડ સીઈઓ ફેલિક્સ લીએ દેશભરમાંથી આવેલા ડિઝાઇન ઇન્ડસ્ટ્રીના 250 થી વધુ પ્રોફેશનલ્સ સાથે ઇન્ડસ્ટ્રીનું ભવિષ્ય અને ઇનોવેશન બાબતે ચર્ચા-સંવાદ સેશન યોજ્યું હતું.

આ પ્રસંગે ખાસ ઉપસ્થિત સપ્તશ્રી પ્રકાશ દ્વારા 'ઈમ્પૅક્ટ ઓફ એઆઈ ઓન ડિઝાઇન' વિષય પર બોલતાં જણાવ્યું હતું કે, કર્મચારીઓની નોકરી એઆઈ નહિ પરંતુ એઆઈ ટેક્નોલોજી સ્વીકારી કામ કરનારા લોકો લઇ જશે. તેમણે વધુમાં ઉમેર્યું હતું કે ડિઝાઇન ઇન્ડસ્ટ્રી જે ક્રિએટિવિટી અને વિઝ્યુલાઇઝેશનથી રન થતું પ્લેટફોર્મ છે. એઆઈ ના આવ્યા બાદ આ ઇન્ડસ્ટ્રીમાં અનેક ફેરફારો જોવા મળ્યા છે. ડિઝાઇનરો એ તેના કેટલાક અંશ ઉપયોગમાં લઇ શકે છે પરંતુ તેના પર સંપૂર્ણ નિર્ભર થવાથી બચવું જોઈએ. તેમને વધુમાં ગુજરાત આઇટી ક્ષેત્રે વધુ સિદ્ધિઓ હાંસિલ કરવાનું પ્રબળ દાવેદાર છે તેમજ સુરતનું જમણ જે ખરા અર્થે મજેદાર છે એવું ઉમેર્યું હતું.

આ મીટ અપમાં વર્ચ્યુલી જોડાયેલા ફેલિક્સ લી એ ઇન્ડસ્ટ્રીના પોતાના અનુભવની વાતો થકી તમામને માર્ગદર્શન પૂરું પાડ્યું હતું.જયારે અહીં હાજર ગૌરવ કુમારે 'મોશન ડિઝાઇન વર્કફલો સિમ્પલીફાઈડ' પર પોતાની વાત રજૂ કરી હતી. તેમણે કોઈ પણ પ્રોડક્ટની વેબસાઈટ અથવા પ્રોફાઇલને આક્રષિત બનાવવા મોશન ડિઝાઇનનું મહત્વ તેમજ તેના વર્કફ્લો વિશે જણાવ્યું હતું. આ ઉપરાંત સુરત ડિઝાઇન કોમ્યુનિટીના ફાઉન્ડરશ્રી મોહિતભાઈ સાવલિયાએ ગુજરાતમાં ડિઝાઇન કોમ્યુનિટીનો ગ્રોથ અને તેની મહત્વકાંક્ષા અને ભવિષ્યના ધ્યેય વિષે સમજાવ્યું હતું. મીટ અપના અંતે ઉપસ્થિત ડિઝાઈનરોએ આ ઇન્ડસ્ટ્રીના જાણકાર મહેમાનો સામે પોતાના પ્રશ્નો મૂકી માર્ગદર્શક ઉકેલો મેળવ્યા હતા.

આ કાર્યક્રમના સંચાલનમાં સુરત ડિઝાઇન કોમ્યુનિટીના ફાઉન્ડર મોહિતભાઈ સાવલિયા, કો-ફાઉન્ડર ઉર્વિક મોરડીયા અને રાજેશ રાદડિયા અનેદર્શન માંડણકાએ સફળ કામગીરી નિભાવી હતી. આ પ્રસંગે રેડ & વ્હાઇટ સંસ્થાના ફાઉન્ડર હિતેશ દેસાઈ, સુરતની વિવિધ આઇટી કંપનીઓના સીઈઓ, સંસ્થાના કર્મચારીઓ અને ભારતના વિવિધ રાજ્યોમાંથી આવેલા ટેક સ્પેશિયાલિસ્ટ અને વિદ્યાર્થીઓ ઉપસ્થિત રહ્યા હતા.

સુરતમાં રાજ્યકક્ષાની 'ડિઝાઈન સ્પાર્ક' મીટ અપ યોજાઈ 

રવિવાર તા. 25 મી ફેબ્રુઆરીએ વડાપ્રધાન નરેન્દ્ર મોદીએ દેશનો સૌથી લાંબો કેબલ સ્ટેઇડ બ્રિજનું લોકાર્પણ કર્યું હતું. દ્વારકાનો આ કેબલ સ્ટેઇડ બ્રિજ આજકાલ કેમ ચર્ચામાં છે, એ પણ જાણવું જરૂરી છે.

આ બ્રિજ બેટદ્વારકા અને ઓખાને જોડે છે. અત્યાર સુધી બેટદ્વારકા જવા માટે જળમાર્ગનો ઉપયોગ કરવો પડતો હતો. સુદર્શન સેતુ નામનો આ બ્રિજ અઢી કિલોમીટર એટલે કે 2320 મીટર લાંબો આ બ્રિજ 978 કરોડ રૂપિયાના ખર્ચે તૈયાર કરવામાં આવ્યો છે. સુદર્શન સેતુ 27.20 મીટરની પહોળાઇ ધરાવતો ફોરલેન માર્ગ છે. આ બ્રિજની બંને બાજુ અઢી મીટર પહોળી ફૂટપાથ પણ બનાવવામાં આવી છે, તેનો ઉપયોગ બેટદ્વારકા ચાલતા જનારા શ્રદ્ધાળુઓ માટે ખૂબ જ ઉપયોગી બનશે. આ બ્રિજ ઉપર સોલાર પેનલ લગાવવામાં આવી છે. આ પેનલ થકી એક મેગાવોટ વીજળી પેદા થશે.આ વીજળીનો ઉપયોગ બ્રિજ પર લાઇટીંગ માટે થશે. બ્રિજના મુખ્યગાળામાં બંને પાયલોન પર 20 x 12 મીટરના ચાર મોરપંખ છે. ઓખા તરફ 370 મીટર અને બેટ સાઇડ તરફ 650 મીટરનો એપ્રોચ બ્રિજ છે. બ્રિજ પર 12 સ્થળોએ પ્રવાસીઓ માટે વ્યુઇંગ ગેલેરી પણ બનાવવામાં આવી છે.

દ્વારકાનો દેશનો સૌથી લાંબો  કેબલ સ્ટેઇડ બ્રિજ કેવો છે ? 

મહારાષ્ટ્રમાં તાલીમાર્થી IAS પૂજા ખેડકરની છેતરપિંડી પ્રકાશમાં આવ્યા બાદ ગુજરાત સરકારના સામાન્ય વહીવટ વિભાગે પાંચ IAS અધિકારીઓના પ્રમાણપત્રોની તપાસ કરવાનો આદેશ આપ્યો હતો. આ પાંચ અધિકારીઓ ફરી મેડિકલ કરાવશે. જેમાં તેમની વિકલાંગતાની તપાસ કરવામાં આવશે.

પૂજા ખેડકરની છેતરપિંડીનો પર્દાફાશ થયા બાદ, UPSC દ્વારા IASમાં તેની પસંદગી રદ કરવામાં આવી છે. ગુજરાતમાં ડિસેબિલિટી ક્વોટા હેઠળ IAS બનેલા પાંચ અધિકારીઓની મેડિકલ તપાસને લઈને ફરીથી ખળભળાટ મચી ગયો છે. રાજ્યના મુખ્યમંત્રી હસ્તકના સામાન્ય વહીવટ વિભાગે તપાસના આદેશ આપ્યા હતા.

ગુજરાત કેડરના આ અધિકારીઓએ 'લોકોમોટિવ ડિસેબિલિટી'નું કારણ દર્શાવીને ડિસેબિલિટી સર્ટિફિકેટ જમા કરાવ્યું હતું. સૂત્રોના જણાવ્યા અનુસાર ગુજરાત સરકારના સામાન્ય વહીવટ વિભાગે ગુજરાતના પાંચ IAS અધિકારીઓના વિકલાંગતા પ્રમાણપત્રો પર શંકા વ્યક્ત કરી છે. એક વરિષ્ઠ અધિકારીએ અંધત્વનો ઉલ્લેખ કર્યો છે, જ્યારે ત્રણ જુનિયર અધિકારીઓએ તેમના વિકલાંગતા પ્રમાણપત્રોમાં 'લોકોમોટિવ ડિસેબિલિટી'નો ઉલ્લેખ કર્યો છે.

સામાન્ય વહીવટ વિભાગે પાંચ IAS અધિકારીઓના વિકલાંગતા પ્રમાણપત્રો પર સંદેહ વ્યક્ત કરતાં તેમની તુરંત મેડિકલ તપાસ કરવામાં આવશે. આ અધિકારીઓની મેડિકલ તપાસ અમદાવાદ સિવિલ હોસ્પિટલ અને એઈમ્સમાં કરવામાં આવે તેવી શક્યતા છે.

ખેડકરકાંડ બાદ ગુજરાતમાં 5 IAS અધિકારીઓનો મેડિકલ ટેસ્ટ કરાવાશે

ગુજરાત સરકાર હવે અમદાવાદના ગિફ્ટ સિટીની જેમ જ સુરતના ડાયમન્ડ બુર્સને પણ ડ્રીમ સિટી અંતર્ગત શરાબ પીવાની છુટ આપી શકે એમ લાગે છે. જો યોજના મુજબ બધુ ચાલશે તો દિવાળી પહેલાં બે મહિનામાં જ આ માટે જાહેરાત થઇ શકે એમ લાગે છે.

વૈશ્વિક હીરા વેપાર કેન્દ્ર બનવાની ભારતની આકાંક્ષાને પરિપૂર્ણ કરવા માટે, ગુજરાતમાં એક ભવ્ય ડાયમન્ડ બુર્સ બની ગયું છે. કેટલાક ડાયમન્ડ બિઝનેસમેનોએ ઓફિસ પણ ધમધમતી કરી દીધી છે, પરંતુ હવે ડ્રીમ સિટીને આંતરરાષ્ટ્રીય સ્તરે બિઝનેસમેનોને આકર્ષી શકે એ માટે શરાબ પીવાની છુટ આપવાની વિચારણા ગુજરાત સરકાર કરી રહી છે.

ડ્રાય સ્ટેટ ગુજરાત હવે સાવ ડ્રાય રહ્યું નથી. ગાંધીનગરમાં ગિફ્ટ સિટીમાં શરાબ પીવાની છુટ આપી દીધી જ છે. હવે ગાંધીનગરના ગિફ્ટ સિટી પછી, રાજ્ય સરકાર ડ્રીમ (ડાયમંડ રિસર્ચ એન્ડ મર્કેન્ટાઇલ) સિટી માટે વ્યવસાયને આકર્ષવામાં મદદ કરવા માટે મોટી વ્યૂહરચનાના ભાગરૂપે શરાબબંધીના કાયદાને સરળ બનાવવાની વિચારણા કરી રહી છે. દરખાસ્ત મંજૂર થયા બાદ ગૃહ વિભાગ અને અન્ય એજન્સીઓ દારૂના વપરાશ અને વેચાણ પર નિયંત્રણ માટે માર્ગદર્શિકા તૈયાર કરશે. જો બધુ યોજના મુજબ ચાલે તો બે મહિનામાં સુરત ડ્રિમ સિટીમાં શરાબ પીવાની છુટ આપવાની જાહેરાત થઈ શકે છે.

ડાયમંડ બુર્સમાં 4,500 થી વધુ ઓફિસો છે, તે 2,000 એકરના ડ્રીમ સિટીનો એક ભાગ છે, જેનો હેતુ હીરાના વેપાર અને સંબંધિત વ્યવસાયિક પ્રવૃત્તિઓને પ્રોત્સાહિત કરવાનો અને પ્રોત્સાહન આપવાનો છે. બુર્સના અધિકારીઓએ રાજ્ય સરકારને દારૂના પ્રતિબંધને હળવા કરવાના સંભવિત ફાયદાઓ વિશે માહિતી આપી હતી. ડ્રીમ સિટીમાં દારૂબંધી હળવી કરવાથી આંતરરાષ્ટ્રીય વેપાર માટે વાતાવરણ ઊભું થશે એવી દલીલ થઇ રહી છે.

સુરતીઓ આનંદો, હવે ‘દમણ’ જવું નહીં પડે ! 

મે મહિનામાં ભીષણ ગરમીનો અનુભવ થતો હોય છે. હા, આ વર્ષે પણ તાપમાન વધી રહ્યું છે, પરંતુ ક્યાંક માવઠું પણ થઇ રહ્યું છે. હવામાન ખાતાની આગાહી મુજબ 17 મી મે સુધી ગુજરાતના વિવિધ વિસ્તારોમાં વરસાદ પડવાની સંભાવના છે.

આજે એટલે કે 15 મી મેના દિવસે હવામાન ખાતાની આગાહી મુજબ સૌરાષ્ટ્ર અને દક્ષિણ ગુજરાતમાં છુટોછવાયો અને હળવો વરસાદ પડવાની સંભાવના છે. આગાહી મુજબ આજે સૌરાષ્ટ્રમાં મોરબી, દ્વારકા, પોરબંદર, જુનાગઢ, ભાવનગર, અમરેલી અને ગીર સોમનાથ જિલ્લામાં વરસાદ પડી શકે છે. દક્ષિણ ગુજરાતની વાત કરીએ તો નવસારી, વલસાડ અને ડાંગ જિલ્લામાં વરસાદ પડવાની શક્યતા છે.

આવતી કાલ તા. 16 અને 17 મી મેના બે દિવસે પણ સૌરાષ્ટ્ર તથા દક્ષિણ ગુજરાતના કેટલાક વિસ્તારોમાં હળવો અને છુટોછવાયો વરસાદ પડી શકે છે. જો કે ચિંતાજનક બાબત એ છે કે વરસાદ પડતાં પહેલાં ઝડપી પવન ફૂંકાવાની સંભાવના પણ છે. હાલમાં કેરીની સિઝન ચાલી રહી છે, ત્યારે કેરીના પાકને નુકશાન થવાની ભીતિ છે. એ ઉપરાંત પવન અને વરસાદને કારણે ખેતીના બીજા પાકોને પણ નુકશાન થવાની આશંકા છે.

હજુ તો 17 મી સુધી વરસાદ પડવાની આગાહી ! 

1 મે ​​1960ના રોજ બોમ્બે રાજ્યથી અલગ થઈને ગુજરાત રાજ્યની સ્થાપના કરવામાં આવી હતી. મહાગુજરાત આંદોલન પછી ગુજરાત રાજ્યની રચનાનો માર્ગ મોકળો થયો હતો, જેનો શ્રેય ઈન્દુલાલ યાજ્ઞિકને આપવામાં આવે છે. તેઓ લોકોમાં ઈન્દુ ચાચા તરીકે લોકપ્રિય હતા.

આઝાદીના થોડા વર્ષોમાં જ અલગ ગુજરાત રાજ્યની માંગ થવા લાગી હતી. આ માંગને વર્ષ 1955-56ની આસપાસ વેગ મળ્યો હતો. તે સમયે કેન્દ્રમાં જવાહરલાલ નેહરુ વડાપ્રધાન હતા. શરૂઆતમાં તેઓએ આ માંગની અવગણના કરી, પરંતુ જ્યારે ગુજરાતમાં અલગ રાજ્યની માંગ વધુ ઉગ્ર બની, ત્યારે કેન્દ્ર અને તત્કાલીન બોમ્બે રાજ્ય સરકારે માંગ સ્વીકારવી પડી હતી. જ્યાં ગુજરાતી ભાષા બોલાતી હતી, એ વિસ્તારને ગુજરાત અને મરાઠી ભાષા બોલાતો વિસ્તાર મહારાષ્ટ્ર રાજ્ય તરીકે અલગ થયા હતા.

વર્ષ 1955માં અલગ ગુજરાત રાજ્યની માંગ ધીમે ધીમે વેગ પકડતી ગઈ હતી.ઈન્દુલાલ યાજ્ઞિકે ઓગસ્ટ 1956માં મહાગુજરાત ચળવળ શરૂ કરી હતી.ગુજરાત રાજ્યની સ્થાપના સાથે ડો.જીવરાજ મહેતાને મુખ્યમંત્રી બનાવવામાં આવ્યા અને અમદાવાદ રાજ્યનું પ્રથમ પાટનગર બન્યું હતું. બે વર્ષ પહેલા રાજ્યમાં જ્યારે પ્રથમ વિધાનસભાની ચૂંટણી યોજાઈ હતી, ત્યારે કોંગ્રેસે 113 સભ્યોની વિધાનસભામાં 15 બેઠકો જીતી હતી. સ્વતંત્ર પાર્ટીને 26 બેઠકો, પ્રજા સમાજવાદી પાર્ટીને 7 બેઠકો અને નૂતન મહાગુજરાત પરિષદને માત્ર 1 બેઠક મળી હતી. ગુજરાત રાજ્યના સર્જક ઈન્દુલાલ યાજ્ઞિકની પાર્ટી જનતા પરિષદને સફળતા મળી ન હતી. સ્વાતંત્ર્ય ચળવળ સાથે સંકળાયેલા યાજ્ઞિક અમદાવાદમાંથી ઘણી વખત લોકસભામાં ચૂંટાયા હતા.

ગુજરાતે છેલ્લા છ દાયકામાં ચોક્કસપણે વિકાસની લાંબી સફર કરી છે. આજે દેશના વડાપ્રધાન નરેન્દ્ર મોદી ગુજરાતના છે. તેમના પહેલાં મોરારજી દેસાઈ પહેલા ગુજરાતી હતા, જેઓ દેશના વડાપ્રધાન બન્યા હતા. ગાંધી અને પટેલની આ ભૂમિને અલગ રાજ્યનો દરજ્જો આપવાનો શ્રેય ઈન્દુ ચાચાને જાય છે. તેઓ એક આંદોલનકારી તરીકે સફળ રહ્યા હતા, પરંતુ જ્યારે તેઓ રાજકારણમાં આવ્યા ત્યારે તેઓ પોતે જીત્યા હતા પરંતુ તેમની પાર્ટીને વધુ સફળતા મળી ન હતી.

1956માં મહાગુજરાત આંદોલન પછી ઈન્દુલાલ યાજ્ઞિકની લોકપ્રિયતાનો અંદાજ એ વાત પરથી લગાવી શકાય છે કે એક વખત પંડિત જવાહર લાલ નેહરુને અમદાવાદમાં સભા કરવી પડી હતી. તેઓ વડાપ્રધાન હતા અને બોમ્બે સ્ટેટની કમાન મુખ્યમંત્રી તરીકે મોરારજી દેસાઈના હાથમાં હતી, પરંતુ અલગ રાજ્ય માટે આંદોલન ચલાવી રહેલા ઈન્દુલાલ યાજ્ઞિકે નેહરુની સભા પહેલા અમદાવાદમાં જનતા કર્ફ્યુની જાહેરાત કરી હતી. આની એટલી અસર થઈ કે લોકો નેહરુની સભામાં ન ગયા. આ પછી નેહરુએ લોકોની સાર્વજનિક લાગણીઓને સમજાઈ અને પછી તેમણે 1 મે, 1960 ના રોજ ગુજરાત અને મહારાષ્ટ્ર રાજ્ય બનાવવાની માંગ સ્વીકારી હતી.

નડિયાદમાં 22 ફેબ્રુઆરી, 1892ના રોજ જન્મેલા ઈન્દુલાલ યાજ્ઞિકનું ગુજરાત રાજ્યની રચનાના 12 વર્ષ પછી 17 જુલાઈ, 1972ના રોજ અવસાન થયું હતું. ઈન્દુલાલ યાજ્ઞિક તેમના જીવનના છેલ્લા 82 દિવસોમાં મૃત્યુ સાથે સંઘર્ષ કરી રહ્યા હતા. પરંતુ છેલ્લે એ જંગ તેઓ હારી ગયા હતા.

ગુજરાત આંદોલનનો આત્મા - ઇન્દુચાચા

આજે 1 મેનો દિવસ વિશ્વભરમાં મજૂર દિવસ તરીકે ઉજવાય છે, જ્યારે ગુજરાતમાં એ જ દિવસ સ્થાપના દિવસ હોવાને કારણે તે અનોખો દિવસ બની રહે છે.ગુજરાત રાજ્યે એ દિવસથી વિકાસકૂચ આરંભી, તે આજ સુધી પાછા ફરીને જોયું નથી.

ગુજરાત અને મહારાષ્ટ્ર રાજ્યોની સ્થાપના 1 મેના 1960 ના દિવસે જ થઈ હતી. જો આપણે તેની સ્થાપનાના ઇતિહાસ પર નજર કરીએ, તો તે રાજ્ય પુનર્ગઠન અધિનિયમ 1956 હેઠળ શરૂ થયું હતું. આ કાયદા હેઠળ, કર્ણાટક રાજ્યનો પાયો કન્નડ ભાષી લોકો માટે નાખવામાં આવ્યો હતો, આંધ્રપ્રદેશ તેલુગુ ભાષી લોકો માટે બનાવવામાં આવ્યું હતું, જ્યારે તમિલ લોકોને તમિલનાડુ રાજ્ય મળ્યું હતું. એ પછી મહારાષ્ટ્ર અને ગુજરાત એમ બે રાજ્યો બનાવવાની માંગ પણ તેજ બની હતી. આ માટે બંને રાજ્યોમાં અનેક આંદોલનો થયા. વર્ષ 1960માં અલગ ગુજરાતની માંગ સાથે ગુજરાત આંદોલન થયું હતું. બીજી તરફ, મુંબઈમાં મહારાષ્ટ્ર સમિતિની રચના કરીને, મહારાષ્ટ્રના નવા રાજ્યની માંગ ઉભી થવા લાગી.

એ માંગ સાથે મુંબઇ કોનું હોવું જોઇએ એ અંગે પણ વિવાદ શરૂ થયો હતો. ગુજરાતની માંગ કરનારાઓ માનતા હતા કે મુંબઇ તેને મળવું જોઇએ કારણ કે ગુજરાતીઓએ મુંબઇનો વિકાસ કર્યો, જ્યારે મહારાષ્ટ્રના લોકોના મતે મુંબઇમાં સૌથી વધુ મરાઠી ભાષી લોકો છે, તેથી મુંબઇ મહારાષ્ટ્રને મળવું જોઇએ. જો કે મુંબઇ રાજ્ય મહારાષ્ટ્રની રાજધાની બન્યું.

બંને રાજ્યો 1લી મેના રોજ તેમના રાજ્યનો સ્થાપના દિવસ ઉજવે છે. ગુજરાતની રચના થઇ ત્યારથી તેની વિકાસની ગતિ તેજ બની છે. એમ પણ ગુજરાત સમૃદ્ધ રાજ્ય છે. ગુજરાતીઓ બિઝનેસ સાથે સંકળાયેલા છે, તેથી ગુજરાતમાં ઉદ્યોગ ધંધાનો પણ ઘણો જ વિકાસ થયો છે. આજે ગુજરાત અનેક ક્ષેત્રે શિરમોર બની રહ્યું છે.

હેપી બર્થ ડે ગુજરાત..... 

આણંદ ભારતના દૂધની રાજધાની તરીકે ઓળખાય છે. આણંદ બુલેટ ટ્રેન સ્ટેશનનો અગ્રભાગ અને ઇન્ટિરિયર ડિઝાઇન દૂધના ટીપાંના જેવા આકાર અને રંગથી પ્રેરિત છે.

આણંદ બુલેટ ટ્રેન સ્ટેશનની મુખ્ય વિશેષતાઓ

•પ્લેટફોર્મની લંબાઈ - 415 મીટર

•સ્ટેશનની ઊંચાઈ - 25.6 મીટર

•કુલ બાંધકામની જગ્યા - 44,073 ચોરસ મીટર

આ સ્ટેશન પર ત્રણ માળ - ભોંયતળિયું, કોનકોર્સ અને પ્લેટફોર્મ હશે, જેમાં બે બાજુ પ્લેટફોર્મ અને વચ્ચે 4 રેલ્વેના પાટા હશે. તે તમામ આધુનિક અને અદ્યતન સાધનો અને સુવિધાઓથી સજ્જ હશે. ભોંયતળિયે ટિકિટ લેવાની જગ્યા અને પ્રતીક્ષાલય, બિઝનેસ ક્લાસ લાઉન્જ, નર્સરી, આરામગૃહ, માહિતી કેન્દ્રો, રિટેલ સેન્ટર્સ વગેરે હશે.

રાષ્ટ્રીય ધોરીમાર્ગ -64 સાથે જોડાયેલ રોડ મારફતે સ્ટેશનનાં હાલનાં જોડાણ ઉપરાંત એનએચએસઆરસીએલે વાયડક્ટની સમાંતરે સ્ટેશનની એક તરફ રાષ્ટ્રીય ધોરીમાર્ગ -64 અને બીજી તરફ રાજ્ય ધોરીમાર્ગ -150 સાથે જોડાણ માટે વધારાની જમીન સંપાદિત કરી છે.

મલ્ટિમોડલ ટ્રાફિક ઇન્ટિગ્રેશન પ્લાન તમામ વાહનોની સરળ, ઝડપી અનેસુરક્ષિત અવરજવર સુનિશ્ચિત કરે છે. પાર્કિંગ અને લેવા / મૂકવાની સુવિધાઓ માટે સ્ટેશન વિસ્તારમાં રાહદારીઓ અને મધ્યવર્તી સાર્વજનિક પરિવહન (આઇપીટી)ની અવરજવર (જેમ કે ઓટો રિક્ષા વગેરે)ને યોગ્ય ધ્યાનમાં લેવામાં આવી છે.

રાહદારી પ્લાઝાની જગ્યાની સાથે કાર, દ્વિ-ચક્રીય, રિક્ષા અને બસ માટે સ્ટેશન બિલ્ડિંગની બાજુમાં યાત્રીઓને લેવા અને મૂકવાનું અને પાર્કિંગ સુવિધાનું આયોજન કરવામાં આવ્યું છે. અલગ કરવામાં આવેલા લેવા અને મૂકવાના અલગ વિસ્તારથી ખાનગી અને જાહેર પરિવહન વાહનો માટે લેવા અને મૂકવાના સમયમાં ઘટાડો થશે અને સ્ટેશન ફોરકોર્ટમાં સરળતાથી અવરજવર થશે અને કામગીરીના પીક અવર્સમાં ગીચતામાં ઘટાડો થશે.

સૌથી નજીકનું રેલવે સ્ટેશન ઉત્તરસંડા રેલવે સ્ટેશન હશે, જે સ્ટેશનથી લગભગ 600 મીટર પૂર્વમાં સ્થિત છે, જ્યારે સૌથી નજીકનું મુખ્ય સ્ટેશન નડિયાદ જંકશન રેલવે સ્ટેશન હશે, જે સ્ટેશનથી લગભગ 10 કિમી દૂર આવેલું છે. સૌથી નજીકનું એરપોર્ટ વડોદરા એરપોર્ટ હશે, જે 54 કિમી દૂર આવેલું છે, જ્યારે અમદાવાદ ખાતે સરદાર વલ્લભભાઈ પટેલ ઇન્ટરનેશનલ એરપોર્ટ સ્ટેશનથી 70 કિમી દૂર આવેલું છે.

નિર્માણાધીન સ્ટેશનને આવવા-જવા માટેના પરિવહનના તમામ મૂળભૂત માધ્યમો સાથે સંકલન દ્વારા હબ તરીકે વિકસાવવામાં આવશે, જેથી સ્ટેશન પર આવવા-જવા માટે વધુ સારું, ઝડપી અને મુશ્કેલી વિનાનુંજોડાણ મળી શકે.

આણંદ બુલેટ ટ્રેન સ્ટેશન માટે ડિસેમ્બર 2021માં પાયાનું કામ શરૂ કરવામાં આવ્યું હતું. હાલ 100 ટકા કોન્કોર્સ સ્લેબ, ટ્રેક સ્લેબ અને સ્ટ્રક્ચરલ સ્ટીલનું કામ પૂર્ણ થયું છે.

આણંદનું બુલેટ ટ્રેન સ્ટેશન કેવું હશે, એ રહસ્ય અહીં જાણવા મળશે  

અંબાજી તથા દાહોદમાં માવઠું થયું હતું. વાદળછાયા વાતાવરણમાં અચાનક જ વરસાદ પડતાં ગરમીમાં રાહત થઇ હતી. જો કે ખેડૂતને ચિંતા વધી છે. ઝાલોદના મીરાખેડી ગામમાં કરા પડ્યા હતા. છેલ્લા કેટલાક દિવસથી વાતાવરણમાં પલટો આવીને વરસાદ પડશે એવી આગાહી હવામાન ખાતાએ કરી જ છે.

જળવાયુ પરિવર્તનનો અનુભવ હવે થઇ રહ્યો છે. છેલ્લા કેટલાક દિવસથી ગુજરાતમાં ગરમીનો પારો ઊંચે જઇ રહ્યો છે. સતત ગરમી વધી રહી છે અને માર્ચ મહિનો પણ ગરમીના વિક્રમ સર્જી ગયા બાદ એપ્રિલમાં પણ રેકોર્ડબ્રેક ગરમી પડે એવા એંધાણ વચ્ચે ભર ઉનાળે વરસાદની આગાહી થઇ છે. હવામાન ખાતાની આગાહી મુજબ 12 અને 13 એપ્રિલે ગુજરાતમાં અનેક વિસ્તારોમાં વરસાદ પડી શકે છે.

વેસ્ટર્ન ડિસ્ટ્રબન્સિસને કારણે ગુજરાતમાં વાતાવરણમાં પલટો આવી ગયો છે. ગુરૂવારે બપોર પછી અંબાજી તથા દાહોદ વિસ્તારમાં માવઠું થયું છે. ઝાલોદના લીમડી તથા વરોડા અને તેની આસપાસના વિસ્તારોમાં કમોસમી વરસાદ પડ્યો છે. વરસાદ પડવાને કારણે ગરમીમાં રાહત જરૂર મળી છે. પરંતુ કેરીના પાકને નુકશાન થવાની ભીતિથી ખેડૂત ચિંતિત બન્યો છે. ઝાલોદના મીરાખેડી અને તંબોઇ ગામમાં તો ભર ઉનાળે ભર બપોરે કરાં પડ્યા હતા. એ જ રીતે અંબાજી પંથકમાં પણ એકાએક વાતાવરણમાં પલટો આવવા સાથે વરસાદ પડ્યો હતો.

યાદ રહે કે રાજ્યમાં 15 મી સુધી માવઠું થવાની આગાહી હવામાન ખાતાએ કરી છે. આ ત્રણ દિવસ દરમ્યાન ભરૂચ, સુરત, નવસારી, વલસાજ અને સૌરાષ્ટ્રના ગીર સોમનાથ તથા કચ્છમાં વરસાદ પડે એવી હવામાન વિભાગે આગાહી કરી છે. જો કે સાબરકાંઠા, અરવલ્લી, દાહોદ, નર્મદા, છોટાઉદેપુર અને મહીસાગર જિલ્લામાં પણ ક્યાંક વીજળી સાથે હળવો વરસાદ પડશે એવી આગાહી હવામાન વિભાગે કરી છે.

ભરઉનાળે આ વિસ્તારમાં કરા સાથે વરસાદ પડ્યો ! 

ભારતીય જનતા પાર્ટીના રાજકોટ બેઠકના ઉમેદવાર રૂપાલા સામેનો વિવાદ ઠંડો પડતો જણાતો નથી, ત્યારે હવે મોદી જ એ આક્રોશને ઠંડો પાડશે એમ લાગે છે. આગામી 22 મીથી વડાપ્રધાન નરેન્દ્ર મોદી ગુજરાતમાં ચૂંટણી પ્રચારનું બ્યૂગલ ફૂંકશે. વડાપ્રધાન મોદી એ દિવસે રાજકોટમાં પહેલી ચૂંટણી સભા યોજશે અને એ દ્વારા રૂપાલા સામે ક્ષત્રિય સમાજના આક્રોશને ઠંડો પાડવાનો પ્રયાસ કરશે એમ લાગે છે.

12 મી એપ્રિલે ચૂંટણી માટે જાહેરનામું બહાર પડી જશે. એ સાથે જ ઉમેદવારી કરવાનું શરૂ થશે. ભારતીય જનતા પાર્ટીએ ભારતીય જનતા પાર્ટીએ તમામ 26 ઉમેદવારોના નામોની જાહેરાત કરી દીધી જ છે. કયો ઉમેદવાર ક્યારે ઉમેદવારી નોંધાવશે એ માટેની તારીખ પણ નક્કી કરી દેવાઇ છે.

છેલ્લી બે ચૂંટણી દરમ્યાન ભારતીય જનતા પક્ષે ગુજરાતમાં લોકસભાની તમામ 26 બેઠકો જીતી હતી. આ વખતે પણ ભાજપ તમામ બેઠકો જીતી હેટ્રીક કરવા માંગે છે. ચૂંટણી પ્રચાર માટે વડાપ્રધાન મોદી ઉતરી રહ્યા છે. તેમની પહેલી જાહેર સભા 22 મી એપ્રિલે રાજકોટ ખાતે યોજાશે. રાજકોટ ખાતે સૌરાષ્ટ્ર- કચ્છ ઝોનની સભા યોજાશે. એ જ રીતે દક્ષિણ ગુજરાત, મધ્ય ઝોન અને ઉત્તર ઝોનમાં પણ વડાપ્રધાન મોદીની જાહેર સભાનું આયોજન થશે. એ માટેની તારીખ હવે પછી જાહેર થશે.

Gujarat